*رئـيـس الـتـيـار الـوطـنـي الـحـر جـبـران بـاسـيـل خـلال الـمـؤتـمـر الـوطـنـي الـسـنـوي:*
- لمّا سألوني بال2022 انت على مين متّكل لحتّى تقول لا لمحور المقاومة ومرشّحه للرئاسة، كان جوابي متّكل على قناعتي وضميري
- لمّا سألوني بـالـ 2025 انت ليش بدّك تبقى برّا لوحدك وترفض مرشّح محور الغرب، كان جوابي اني باقي مع حريّة قراري ومع كرامة تياري، وباقي انا والقرار الوطني الحرّ وكلّ أهله
- لبنان عم يواجه اخطار وجودية مصدرها الداخل والخارج ونحنا احوج ما نكون للقرار الوطني الحرّ- هو يلّي بيحمينا وبيحفظنا... بيحفظ الوجود...
وبيحمي لبنان من مشاريع التفتيت والحروب الطائفية يلّي حوّلت سوريا لدولة فاقدة للسيادة ومجتمع مفكّك بتعصف فيه الصراعات المذهبية
- المشهد السوري الدامي يضع اللبنانيين امام تحدّي حماية التنوّع اي حماية الهوية
- احتلال اسرائيل لأراض لبنانية جديدة والسكوت عنه دولياً واستساغته داخلياً يضع لبنان امام خطر مشروع اسرائيل التوسّعي يلّي اتفاق وقف اطلاق النار والقرار 1701 ما اوقفوه
- خطر الوجود لازم نتطلّع عليه بصورته الشاملة من مصر والاردن وفلسطين وسوريا والعراق ولبنان –وهو بيدفعنا نوجّه للجميع دعوة للتلاقي وصياغة مشروع وطني يحفظ الوجود، وجود لبنان الكيان والدولة
- لبنان ما بيسوى يكون بمحور عم يتدخّل بشؤون الدول ومصالحها ليدخّلها بحروبه، ولا بيسوى يكون بمحور عم يمسّ بدول المنطقة وحدودها وحقوقها أو وجودها...
- لبنان المحيّد عن المحاور لازم يكون محور التلاقي ومنصة الدفاع عن الحقوق والحريات والشرائع
- القرار الوطني الحرّ هو يلّي بيسمح بخطّة واجراءات حكومية فاعلة لإعادة النازحين السوريين لبلدهم، وبيخلّي رفض التوطين يكون خطّة عمليّة ومش شعار، منقنع الدول فيها ومنستعمل نقاط قوّتنا والحاجة لنا لتحقيقها
- القرار الوطني الحرّ هو يلّي بيخلّينا نعالج موضوع السلاح، اي سلاح، بحسّ سيادي مسؤول، لحتّى الدولة وحدها تحتكر السلاح وتبسط سلطتها على اراضيها...
بس كمان لتعرف تستفيد من هالسلاح لتقدر تدافع عن لبنان وتحميه بقرار حرب وسلم هي تملكه
- نحنا اثبتنا اننا الوحيدين يلّي ما تأثّرنا بموجة الضغط على لبنان وبالموجة العالية متل ما سمّوها ولا شعرنا حالنا مضغوطين لنقول لا للقريب والبعيد
- المعارضة مش نكد وتخريب، المعارضة بتكون حافز للحكومة والعهد لحتّى ينجحوا، لأنّها بتراقب، بتسائل، بتحذّر وبتصحّح – ما بتعترض لتعترض، وما بترفض لترفض، بيكون عندها بدائل...
ولهيك رح يكون عنا حكومة ظل بتتابع كل وزارة بشكل موضوعي وبتساعد الوزير وبتشجّعه وين بيريد وبتنتقده وين بيلزم
- يا كلّ مين افشلتم لبنان بحقدكم على ميشال عون والتيار، اخرجوا من الحقد وما تتسبّبوا بفشل جديد للبنان ولرئيسه الجديد
- نحنا اليوم بعهد جديد وحكومة جديدة مدعومين من الخارج بالكامل، وعندهم موافقة عريضة من الداخل...
بين ايديهم مهمّة فورية واضحة وهي تنفيذ الـ 1701 واتفاق وقف اطلاق النار، يعني سحب السلاح من حزب الله، وفي مهمّة ثانية لاحقة ومخفيّة هي التطبيع مع اسرائيل
- رئيس الجمهورية بخطاب القسم والحكومة بالبيان الوزاري حكيوا عن احتكار السلاح بيد الدولة، ونحنا معهم - والقوات هيك حدّدوا مهمة الحكومة وانو ما تعمل شي ثاني، وهنّي بدهم وفيهم. عندكم كل الدعم اللازم، تفضّلوا الى التنفيذ
- في شغلتين منعارضهم:
1 – سحب سلاح من خلال حرب أهلية بدل ما يكون من خلال تفاهم ولو مفروض
2 – تطبيع مفروض من دون حقوق بدل ما يكون سلام عادل مع حقوق
- نحنا كنا ضد سوريا لما كانت بلبنان وصرنا معها لمّا ضهرت، وانتوا كنتوا معها لما كانت بلبنان وصرتوا ضدّها لما ضهرت.
- اليوم الجيش السوري خرج ونظام الأسد سقط – باقي احتلال من نوع ثاني هو النازحين
- لمّا بيكون في شعب ثاني اكثر من نصف شعبك موجود على ارضك، وما عنده سبب يكون موجود وانت بدّك ياه يخرج، وما بيضهر طوعاً، ولازم يضهر ولو قسراً، شو بيكون اسمه؟ احتلال!
- عم نحكي عن شعب نزح لعندك بسبب نظام سقط وما عنده سبب يبقى وما عنده اوراق شرعية لبقائه ولا قانون لبناني او دولي
- تفضّلوا، كل الوزارات والملفات بين ايديكم وكل الحقائق تحت عيونكم، تفضّلوا تحرّكوا ونحنا جاهزين للمساءلة، وأي فضيحة علينا وسرقة مال عام ما تقصّروا وخدونا على المحاسبة! بس اذا ما لقيتوا وما رح تلاقوا، اقلّ شي تعتذروا من الناس!
- نحنا بدّنا كهرباء ولو على ايد القوات. حاضرين نساعد اذا بيريدوا، واذا مش بحاجتنا، منتفرّج ومنشوف كيف بدّهم يعملوا كهرباء رخيصة من دون معمل بدير عمار، وبعد هيك بالزهراني وبسلعاتا...
واذا بدّهم غير سلعاتا ما مشكلة، بس بين البترون والمتن لأن التوزيع الكهربائي والانمائي هيك بيقتضي
