*باللهجة اللبنانية يوسف رجي دولة عظمى*
*✍️ علي خيرالله شريف*
بيقولوا بعلم السياسة والدبلوماسية ما في عداوة دايمة ولا في صداقة دايمة. وبيقول المثل الشعبي يلي بيجيه الصلح وما بيصالح بيكون جبان واللي بيجيه القتال وما بيقاتل بيكون جبان.
وفي مثل شعبي آخر بيوصف الشخص لي مقدر حالو أكبر من حجمو "متل شيخ الديماس، كبير بحالو زغير بين الناس".
نموذج هالأمثلة الشعبية الثلاثة زوزو رجي وزير خارجية القوات اللبنانية في حكومة نواف سلام. هادا الوزير، بالإضافة لكتير خصال غير حميدة، جامع ثلاث خصال غير حميدة إضافية، بتلاقيه عداواتو دايمة(إلا مع العدو) وجبان، وبيشبه شيخ الديماس.
صاحبنا كان قنصل وأنجأ كان يحلم يصير سفير. وفجأةً عينوه وزير خارجية.... كبرت الخسة براسو وما عاد يتحمل هول الصدمة. وصار يتخايل حالو وزير خارجية شي دولة كبرى عندها حق الفيتو وماسكة بخوانيق الشرق والغرب. وأول شغلة فكر فيها إنو ينتقم من إيران والحزب(العدوين الدائمين له). الظاهر كان كل عمرو معقد منهم. ولو قادر كان بلش يصدر عقوبات عليهم ويعلقلهم المشانق.
سبحان الخالقو، جامع بشخصيتو إجرام سمير جعجع، ولؤم المارونية السياسية وشوفينيتها، وقوقعة المصاب بالتوحد.
هادا البني آدم معتبر وزارة الخارجية وراثة من بيو أو تابعة للمجلس الحربي لحزبو، وعم يتصرف فيها عا مزاجو. وعم يسعى دائماً تا يقطع علاقات لبنان مع إيران. تصوروا انو يوسف رجي حاطط براسو يواجه إيران.
من أيام رفض زوزو رجي دعوة وزير خارجية إيران تا يزور طهران. بغض النظر مين طلب منو يرفض، الظاهر حضرتو خايف اذا زارها يتفاجأ بالحقيقة الساطعة عن أخلاقها وتقدمها ونظافتها وطهارتها، وخايف يستحي عا دمو من حقدو عليها.
عنا بلبنان أمثلة كتيرة من هالنمرة؛ واحد بيقول "ما بدي اضغط عا ترامب" ، والتاني والتالت بيقولوا مقولة "ما بيشبهونا، وواحد متخايل حالو حكيم الحكماء، وقرطة عاطلين عن العمل ماسكين هواتفهم وقاعدين عا قفاهم، وما عم يخلوا حدا من شرهم، بالشتم والتنمر والمسخرة. يعني فيكم تقولوا عنا بلبنان مجموعة دول عظمى مجموعين باليمين اللبناني،كل واحد منن بيتخايل حالو عنتر زمانو مع ولاد بلدو، وقدام السفير أو الأمير، أوطى من سجادة وأضعف من زيتونة مرصوصة.
نحن كمواطنين وطنيين إلنا حق نسأل الحكومة ومجلس النواب، هل سياسة المناطحة اللي متبعها يوسف رجي هيي سياسة مجلس الوزراء أو الأخ فاتح عا حسابو؟ وإذا كان فاتح عا حسابو مين بيحاسبو؟ ووين وزراء الثنائي الوطني مش عن نسمع صوتن؟ الظاهر قابضينها حيادية الشباب؟ ووين موقف مجلس النواب؟ على الأقل النواب الوطنيين؟
بالمختصر المفيد، لأيمتى بدو يضل زوزو رجي قايد الحكومة عا مزاجو ومزاج سمير جعجع تبعو؟ وهل يا ترى في خطة دبلوماسية مقررة من مجلس الوزراء عم يطبقها، أو ماشي على عماها ويا ربي تجي في عينو؟
الاثنين ١٥ كانون الأول ٢٠٢٥
