*علي برو حيطو مش واطي*

*بقلم علي خيرالله شريف*

أوطى شي عند علي برو أعلى من أعلى سقف بهيك دولة،
وعلي برو أعدل من عدلكم الأعور، وأفهم من وزير عدلكم الأرعن يلي عم يمارس حقد وفئوية ومراهقة سياسية..
مش علي برو يلي بيفوت عالسجن، ويبقوا أحرار جماعة الفتنة والعنصرية والتحريض والشتم والقدح والذم والتنمر والمسخرة والتهكم...
لما بيكون الحبل مرخي للأبواق الناعقة والأصوات الشاذة متل رامي نعيم وطوني ابي نجم وطوني سعد وطوني بولس ومجدولين اللحام ومي شدياق وبولا بعقوبيان والمطربات النشاز، والنواب السفهاء، والمحامين السخفاء ومنتحلي صفة الإعلام، وغيرهم من قطيع الذباب الإلكتروني العاطلين عن العمل وعن الأخلاق وعن الإنسانية والوطنية...
بدل ما تحاسبوا علي برو عا صراحتو وهضامتو، روحوا حاسبوا وزير خارجيتكم القواتي يلي عامل محامي العدو بكل وقاحة وعم يدافع عنو، وعم يوجهلو دعوات "رسمية" تا يضرب المطار والـمُدُن والقُرى والأحياء...
علي برو ما صَنَّف المواطنين طائفياً وما قال "ما بيشبهونا"، ولا شَتَم معتقد طايفة وقال تجليطة
علي برو ما قال بدي إدعس وبدي إحرق، ولا تعنتر وشتم اللحية والعمامة والشوارب والـمعتقد...
بي وطن متل لبنان، مليان كذب وفوضى وانتحال صفة، علي برو بيطلع قديس بالصدق والانتظام والتهذيب، وبيعطي دروس بالنزاهة والوطنية والشفافية، لأنو عم يدُل على الخلل بهالوطن الفلتان والمليان تخبيص وزحف وعنتريات من أنصاف المبعوثين المنبوذين من شعوبهم وجايين لعنا يعتبرونا حيوانات متلهم.
علي برُّو بيستحق يكون مطرح كتير رؤساء ووزراء وقضاة وزعماء مش خرج يكونوا بلجنة بناية، لأنو أحرص منهم كُلّهم على السلم الأهلي وعلى سلامة الوطن والمواطنين وأكفأ منهم بإدارة البلد...
ولما القضاء بيكون استنسابي والنيابة العامة انتقائية والأحكام كيديّة، بيتوه العدل بزواريب البلطجة، وبيصير البلد شريعة غاب.
القاعدة بتقول "ظلمٌ بالسويَّة عدلٌ في الرعية"، أما في لبنان، فالقضاء بالأهواء والعدل بالاستنساب وبالضغينة والمحسوبية.
حبس على برُّو هوي حبس لكل لبناني شريف، وتعبير عن حكومة ضعيفة الشخصية ماشية من برا بالريموت كونترول وعم تفوت بالحيطان، ومش عم تفهم شي من شي.
علي برو حيطو مش واطي وما بنصحكن يبقى كتير بالحبس، ومش هوي اللازم يتحاكم..
يلي لازم يتحاكم هو رجل الدين اللي عامل سفير جوال عند العدو، والمسؤول والوزير والزعيم يلي عم يستقبل الصهاينة بجوازات سفر أميركية وخليجية، ومختومة بنجمة داود وبلهجة الإملاءات المفخخة، ويلي عامل بخاخ سم عند الأجنبي ضد ابن بلدو، وعم يقضي وقتو تحريض عالحرب الأهلية.

مساء الأربعاء 11 آذار 2026