خطاب رئيس جمهورية أم قصيدة زجلية
*بقلم المستشار في القانون الدولي الدكتور قاسم حدرج*
قاعد ناطر متل الشاطر خطاب #رئيس_الجمهورية فتفاجأت بمقطوعة انشائية تصلح لمرشح لحملة انتخابية .
يا فخامتك هيدي حكي أبو عبد البيروتي عالقهوة مع صحابو مش حكي شخص مسؤول عم تهد ترعد عم تتعهد وتوعد الشعب بالسلام وعم تخاطب بشكل خاص الضحايا المباشرين لهيدي الحرب ومصدق حالك انك بتمثلهم او مكلفينك ترجعهم عبيوتهم
بأتفاقية ذل مع الاسرائيلي ،انت عامل متل قائد جيش عم يخطب بجيشو يلي مسلح بنقيفة وأم حبة ويوعدو بالنصر وهوي رايح يواجه جيش مسلح بالطائرات والدبابات والصواريخ هيدا فخامتك أسمو شعارات كذابة بتودي عالأنتحار بينما بالخيام وبنت جبيل أسمو تضحية بطولة وأنتصار.
فخامتك الرجل المسؤول لما بدو يوجه خطاب للشعب ما بيقوص عأهل بلدو ومقاومتو لأنو هني الشعب وهني أم الصبي المفروض انو يوجه كلامو للعدو ويهددوا بما يملك من اوراق قوة وانت ورقة التوت ما عندك ،المفروض يخبرنا عن الخطة يلي رايح فيها بالمفاوضات وشو ردو على شروط نتنياهو التلاتة نزع السلاح
منطقة أمنة وسلام دائم تحت سقف القوة وتخبرنا شو رح تعطيه مقابل الحصول منو على كل هيدي المكتسبات انسحاب انتشار وعودة ،طبعا ما بتملك شي يعني عم تفهمنا انو نتنياهو يلي تكبد خسائر فادحة بجيشو وألياتو وسمعتو وتهجير مستوطناتو وانهيار اقتصادو رح يفرط بكل هودي لما تواجهو بالكاريزما تبعك وقوة منطقك الأنشائي ،هوي رح يقدملك مؤقتا كل هول بس مقابل رأس المقاومة يلي مانعتو من السيطرة على لبنان فهل تعد اللبنانيين بالازدهار بأن توقف النار على اسرائيل وتشعل النار في الداخل اللبناني ليرضى عنك السيد ترامب ويرش لك بعض العطر
وتسجل اسمك في سجل القادة الموارنة وليس اللبنانيين لأنك نجحت في اعادة اللحديين الى الجنوب بدل سكان القرى الاصليين
غلطان كتير فخامتك وحساباتك كلها غلط ويلي متكل عليهم وبتسميهم اصدقاء من اميركا للسعودية رح يقدموا راسك عند التسوية بين الاقوياء هدية واذا مش مصدقني احمل التلفون واتصل بعبد ربخ منصور هادي يلي استخدمو بلعبة الانقلابيين والشرعية ورحل منصور الى مزابل التاريخ واصبح انصار الله اسياد اليمن والجوار فنصيحة لا تقف في الجانب الخطأ من التاريخ لأنه لا يرحم الضعفاء الذين يستقوون بسيف الغريب على صاحب الدار ،اعتبر هذا الكلام نصيحة او اعتبره انذار.
